R12 000 vir Kansa

Hoërskool Uitsig het R 12 000 ingesamel tydens ‘n onlangse Sprayathon ten bate van KANSA.  Dit is die meeste wat deur ‘n skool in Pretoria ingesamel is. Die entoesiasme en deelname van al die leerders het Mev Anne-Lett Geldenhuys, liefdadigheidskoördineerder van die skool, oorweldig.  Talle leerders het hul verhale van hoe hul direk of indirek deur kanker geraak word, met haar gedeel. Die woorde:  “Ek spuit my hare pers vir my ma of my tannie of my nefie …”, het Mev Geldenhuys laat besef dat die verskil én die sukses van die dag daarin lê dat kanker ‘n werklikheid is in baie mense se lewens.
 ‘n Sprayathon is die alternatief vir ‘n Shavathon, wat beteken dat die leerders se hare nie afgeskeer word nie, maar tydelik gekleur word met nie-allergeniese spuitverf wat met die eerste was uitwas. Dit is die negende jaar wat KANSA die Shavathon fondsinsamelingsprojek aangebied het, maar die eerste jaar wat skole aktief genader is om deel te neem. Die fondse wat op die manier ingesamel word, word deur KANSA aangewend vir navorsing, bewusmaking en ondersteuning.